PM leh Global Outreach-a kal chhuakte inkawm

Prime minister Narendra Modi chuan Thawhlehni khan India aiawh a khawvel ram hrang hrang 33 tlawha zin chhuak team pasarihte chu a chenna, Lok Kalyan Marg, New Delhi-ah a kawm. India aiawha zin chhuakte hi Parliament member ni lai, party hrang hrang aiawh thlan chhuahte niin India-in firfiak pawl laka hma a lak dan thar leh, Operation Sindoor kalpui chungchang hrilhfiahna hun an hmang a ni.

Meeting-ah hian PM Modi chuan team hrang hrangte hmalakna hlawhtlinna chuan India leh ram dangte inṭhianṭhatna awm sa chu a ti nghet zual dawn tih a sawi. Firfiak do kawnga India ṭanhmun nghet tak a ti lang bawk niin a tarlang.

India aiawha zin chhuak team pasarihah hian member 50 awmin, sorkar laipui chuan an hmalakna te vang hian a lo fak nasa tawh hle. Zin chhuak zingah hian MP chu a tam ber niin, anni bakah sorkar official chawl tawh leh politician hlui eng emaw zat an tel ve bawk. PM nen a inkawmnaah hian an thil tawn hrang hrang, in ang lo tak tak in hrilh tawnna hun an hmang nghal a ni.

Modi chuan ram aiawha zinchhuakte a kawm rual hian, Thawhlehni vek khan India chu defence huangah nasa taka a ṭhan thu sawi. India-in mahni siam chhuah ralthuam rintlak leh hman tlak tak tak a neih chu kum 11 chhung BJP kaihhruaina hnuaia India hmasawnna lian tak pakhat a nih thu a tarlang tel bawk.