Darkar 24 chhungin Covid-19 kai thar 1,383 Hri vanga thi mi 50 an awm

Union home ministry chuan Thawhlehni khan India ramah Covid-19 kai thar mi 1,383 an awm a, he hri vanga thi mi 50 an awm tih nimin khan a sawi. 

India ramah Maharashtra chu hri kai tamna ber state a la ni zel a, Delhi leh Gujarat-ten an dawt. Hri vanga thi tamna ber pawh Maharashtra niin, Gujarat leh Madhya Pradesh-te chu thi tamna state an ni bawk. 

Nimin khan civil aviation minsitry-a official pakhat chu coronavirus a kai tih hriat a ni. April 15 khan office pawh a la kal a, hei vang hian a office kalpuite chu inkhung hrang nghal vek tura hriattir nghal an ni. New Delhi-a Rajiv Gandhi Bhawan-a ministry headquarters pawh khar nghal a nih thu union minister Hardeep Puri chuan a sawi. 

Union ministry of health and family welfare-a  joint secretary Lav Agarwal chuan India rama hri kai zinga 80% chu ngaihtuahawm lo leh an taksaa natna langchhuak lem lote an ni tih a sawi. Hetih lai hian enkawl mek zinga 15% chu an ngaihtuahawm a, an zinga 5% te an dinhmun a ṭha lo hle tih a sawi. 

Indian Council of Medical Research (ICMR) hotu Dr Raman R Gangakhedkar chuan India rama Covid-19 kai hmuhchhuah zinga 80% dawn chu hri kai si, an taksaa natna langchhuak si lo, asymptomatic an ni tih a sawi. An taksaah natna lang chhuak lo mah se midangah an kaichhawn theih tho avangin hri thehdarhtu an ni thei a ni.