CAA hi danpui kalh a ni, sut leh nghal tur a ni: Yaswant Sinha

BJP hruaitu hlui leh union minister hlui Yaswant Sinha chuan Citizenship (Amendment) Act (CAA) chu ram danpui kalh a ni a, sorkar laipui chuan a sut leh nghal a ngai a ni, a ti. Singh chuan ramchhung hmun hrang hrang, a bikin BJP rorelna state-a CAA duh loa nawrh huaihawtte laka tharum thawhna thleng chu chhui chian a phut thu a sawi bawk. 

"Sorkar laipui chuan mipui rilru lakpen a tum a, mahse hei hian a daih rei dawn lo. Ram danpui kalh a nih avangin CAA hi a sut leh ngei tur a ni," a ti. Ramchungah harsatna leh buaipui ngai hrang hrang- loneitute buaina, ṭhalaite din­hmun leh hna awm lo chung­changte buaipui a ngai tih sawiin, sorkar laipui chuan hnam leh sakhaw lam hawia inthliarhranna engmah awm loin a tihtur chu a hlenchhuah a ngai a ni, a ti. 

Tamil Nadu-a eptu pawl lian ber,  DMK chuan CAA, National Register of Citizens (NRC) leh National Population Register (NPR) duh lohna lantirin signature campaign lian tham tak buatsaih a tum. February 4-8 chhungin he campaign hi kalpui an tum a ni. Signature an lakkhawmte chu president Ram Nath Kovind hnenah an hlan ang. DMK hotu MK Stalin chuan CAA chu sut leh tur a ni tih sawiin, hemi rual hian NRC chu kalpui tur a ni lo, a ti. NPR chu Tamil Nadu-ah kalpui an remti dawn lo tih a sawi bawk.