Sorkar laipuiin DA tipung rih dawn lo
Sorkar laipui chuan sorkar hnathawkte dearness allowance (DA) a tihpun tumna chu ram chhunga coronavirus leng vanga sum lama indaih lohna a nasat avangin a kalpui rih dawn lo.
Nimin khan union cabinet chuan DA tihsan tumna kalpui hrih loh tura rawtna chu a ngaihtuah a ni. He rawtna hi pawmin, hei hian central sorkar hnuaia thawk nuai 49.26 leh pensioner nuai 61.17 a nghawng dawn a ni.
Hri leng vanga ram puma lockdown kalpui a nih avangin sorkarin chhiah aṭanga a sum hmuh pawh a tlahniam hle a, hetih lai hian mi tam tak chhawmdawl leh ṭanpui ngai an awm vangin a sum hmanchhuah erawh a sang hle thung.
Sorkar laipui chuan Covid-19 leng vang hian sum lam indaih lohna phuhruk nan Parliament member-te hlawh chu kum khat chhung atan 30% in a tihniam a, MPLAD scheme pawh kum hnih chhung titawpin, hemi atana sum dahte hi coronavirus dona atan hman a ni ang. He scheme aṭanga sorkarin sum a hum tur hi cheng vaibelchhe 8,000 a tling dawn a ni.
Hri leng avangin MP-te hlawh tihtlem a nih hnuah sorkar laipui hnuaia thawkte a nghawng ve leh a, state ṭhenkhat chuan sorkar hnathawkte hlawh tihhniam a nih tur thu pawh an puang tawh bawk.