Israel-Iran inkar buaina vangin India-in kaihhruaina ti chhuak

Israel chuan nimin Zirtawpni zing lamah khan Iran ramchhunga nuclear facility-te beiin, ram pahnih inkar ṭha lo sa chu a zual nasa hle. Hei vang hian India chuan Israel leh Iran a zin tumte tan kaihhruaina hmanhmawh thlak a ti chhuak ve nghal.

India chuan Israel-in Iran hmun pawimawh ṭhenkhat a kap tih a hriat hnuah, India khua leh tui Iran-a cheng te chu eng pawh thleng thei a ni tih hriaa in ralring reng turin a chah. Iran-a Indian embassy chuan thil tha lo thleng thei a la nih avangin Iran-a awm mek India mite pawh ṭul loa pawn chhuak tam lo turin a chah zui bawk.

Hetih rual hian Israel-a Indian embassy pawhin Israel-a India mi awm mekte tan fimkhur tura chahin thurawn a ti chhuak ve nghal bawk. Israel leh Iran inkar buai vang hian Air India thlawhtheihna 15 chu a kawng thlak sak leh thlawh chhuahna hmuna kir leh tura tih an ni bawk niin an tarlang.

India embassy in ram pahniha India mi leh sa chengte tana kaihhruaina a tih chhuah hma lawk hian Israel prime minister Benjamin Netanyahu chuan Iran nuclear siam chhuah tih tlem a nih theihna turin 'Operation Rising Lion' kalpui a nih thu a puang a ni.