Thlawhtheihna chesuala thi 33 te DNA hmangin finfiah tawh

Air India thlawhtheihna, kar hmasa Ningania Ahmedabad-a chesuala thi zinga ruang 33 DNA finfiah tawh a ni. DNA finfiah tawh zinga ruang 12 chu an chhungte hnenah an hlan tawh tih Pathianni khan thuneitute chuan an tarlang. Thlawhtheihna chetsual vang hian a chuangte mi 241 bakah, a tlakna hmuna mi 29 thite nen, an vaiin mi 265 in an thih phah a ni.

Chetsualna thlenga thite chhungte pui tur leh,chhiatna thlenna hmuna ruang hmuhte finfiah kawnga thawk tur hian ram chhung hmun hrang hrang aṭangin team 230 tirh an ni. Thi zingah hian ram dang mi eng emaw zat an tel avangin, heng team-te hi ram pawn lama thawktute nen pawh an thawk ho bawk.

Chhiatna thlenga thi chhungte hnenah hian death certificate chu a hmunah thil tihfel a awlsam zawk nan pek chhuah nghal zel a nih thu senior IAS officer chuan a sawi. Ruang finfiah tawhte hi police venna nen, ambulance hmangin an khuaah phurh zel an ni dawn tih a sawi, hei bakah mitthi chhungte, rilru hrehawm taka awmte pui turin grief counsellor-te pawh rawih sak tel zel a ni dawn tih a sawi. DNA hmanga ruang finfiah tawh zingah hian Gujarat chief minister hlui Vijay Rupani pawh a tel.

Air India thlawhtheihna chetsual dan chhui chiang tura tih Aircraft Accident Investigation Bureau (AAIB) chuan Zirtawpni liam ta khan thlawhtheihna tla them zing aṭangin 'Black box' an hmu chhuak. Black Box hi BJ Medical College hostel mess building chungah hmuh a ni a, he an thil hmuh hian thlawhtheihna tlak dan kimchang chhui kawngah nasa takin a pui thei dawn a ni.

Chhiatna thlen dan kimchang chhuina kawngah hian US aṭangin National Transportation Safety Board bakah American aviation regulator, Federal Aviation Authority chuan an pui dawn bawk.