J&K-ah khualzin tlawh tamna hmun 8 hawng leh

Jammu and Kashmir-a April 12-a Pahalgam hmuna firfiak pawl pawikhawihna avanga mi 26 thihna leh India leh Pakistan innghirnghonate a thlen avang hmun hrang hrang khar a nih hnuah, khaulzinte tlawh tam ṭhinna hmun pariat hawn a ni leh ta.

Firfiak pawl beihna thlen hnu khan khualzinte hmun tlawh ṭhin 48 chu khar a ni a, heng zinga pariat chu Jammu and Kashmir Lt Governor Manoj Sinha chuan nimin khan tlawh theihin a hawng. Sinha chuan district hrang hranga thuneitute report aṭangin thil duhawm lo thleng awm lo a, boruak a ṭhat chhoh zel vangin heng hmunte hi hawn an ni tih a sawi.

Khualzinte tlawh ṭhin hmun hawn thar leh te hi Betab Valley-a awm Pahalgam Market park, Verinag garden, Kokernag garden, leh Achabal garden, Kashmir chhim lama mi bakah Srinagar hmuna awm Badamwari Park, Duck Park (Nageen) leh Taqdeer Park (hazratbal) te an ni. Lt Governor Sinha chuan Jammu huam chhunga khualzin tlawh ṭhin hmun pariat chu hawn a ni leh tur thu a puang nghal bawk. An hawn turte hi Kathua district-a Sarthal leh Dhaggar, Reasi-a Devipindi, Siyad Baba leh Sula Park, Doda-a Guldanda leh Jai Valley bakah Udhampur-a Pancheri te an ni.