Ram 3 tlawh turin PM Modi a zin chhuak

Prime minister Narendra Modi chu ram pathum - Cyprus, Canada leh Croatia ram tlawh turin nimin khan a zin chhuak.

Prime Minister hian Republic of Cyprus a tlawh hmasa dawn a, an ram president Nikolas Christodoulides nen inkawmin insumdawn tawnna, investment, technology leh security lama ram pahnihte thawh dunna zau leh thuk zawk siam dan tur a sawipui ang. A zin chhuah hmaa thu a sawiah, PM Modi chuan Cyprus ram a tlawh hian ram pahnihten hun rei tak inzawmna nghet tak an lo neih tawh tih ngheh lehzualna kawngah a pui dawn a, India leh Cyprus ram mipuite intlawh tawnna ṭha zawk pawh a siam dawn a ni, a ti.

Cyprus aṭangin PM hian Kananaskis, Canada a pan dawn a, G7 Summit a hmang ang. Canada prime mnister Mark Carney chuan summit chhim tur hian Modi hi a sawm a ni. Canada a tlawh hnuah a tawpna ber turin Croatia ram a tlawh dawn a, India prime minister zingah Croatia ram tlawh hmasa ber tur a ni. President Zoran Milanovic leh prime minister Andrej Plenkovic te a hmu dawn a, thawhdunna ṭha siam dan turte a sawipui ang.