India hi khawvela ram hausa pathumna a ni thuai dawn: PM Modi

Prime minister Narendra Modi, ram pathum tlawha zin chhuak mek chuan,Cyprus-a thlen hnuah Limmasol-a sumdawnna chungchang sawi honaah Cyprus president Nikos Christodoulides nen telin, India chu khawvela ram hausa pathumna a nih thuai dawn thu a sawi.

PM Modi-a'n Cyprus a tlawh hi, India PM in kum 23 hnua Cyprus a tlawh lehna hmasa ber a ni a, India-Cyprus in sumdawnna kawnga thawh dunna an neih thuk zia ti langtu a nih thu Modi hian a sawi. Modi hnenah hian nimin, Thawhlehni khan Cyprus ram civil mite hnena chawmawina sang an hlan ṭhin, 'Grand Cross of the Order of Makarios III' chu president Nikos Christodoulides in a hlan bawk.

Sumdawnna chungchang sawi hona, rountable neihah PM Modi chuan Cyprus-a company-te hnena India-in an ecconomy ti hmasawn thei tur ṭha tak a siamsak theih thute a sawi. Hei bakah kum 11 ram a hruai tawh chhungin nasa taka economy siam danglam a nih chhoh dan te chu uar taka tarlan a nih thu external affairs ministry chuan an thuchhuahah an tarlang.

Modi hian India-in thiam bikna neite bul ṭanna tur a ruahman sak ṭhin thu leh AI, Quantum, semiconductor, leh critical minerals huangah India a ṭhan nasat thu te uar takin kalkhawm zingah hian a sawi lang. Cyprus chu khualzinte tlawh nasat a nih thu sawiin India pawhin chutiang ni tura hma a lak mek thu a sawi bawk.

Heng bakah hian PM chuan India–Greece–Cyprus (IGC) Business and Investment Council, ram pathumte insumdawn tawnna tur hawn thar a ni chu a lawm thu a sawi. Hemi kaltlang hian ram pathumte hian shipping, logistics, renewable energy, civil aviation leh digital services huangah in sumdawn tawnna an kalpui thei dawn a ni.