Tehran-a India mi awmte hmun him lamah sawn

Israel-Iran inkar buaina sosang zel avangin Tehran-a India Embassy chuan tualchhung thuneitute nena thawk dunin nimin, Thawhṭanni khan India mi leh sa awmte chu hmun him lamah an sawn. Israel leh Iran hi nimin thleng khan drone leh missiles hmangin an in la inkap tawn reng a ni.

Tehran-a zirna in sang hrang hrang University of Medical Sciences, Islamic Azad University Tehran Medical Sciences, leh Iran University of Medical Sciences-a zirlai te chu Israel lam aṭanga beihna thleng thei laka an him theihna turin bus hmangin sawn chhuah an ni.

India mite hian Azerbaijan leh Iran ramri lam aṭangin Iran chhuahsan theih mah se, thuneitu lam chuan bus hmanga Iran ram chhung hmun him pan zawk turin thurawn an pe thung.