Criminal record neite party-in ticket an pe tur a ni lo : ECI

Election Commission of India (ECI) chuan nimin khan Supreme Court hnenah political party-te chuan an candidate atan criminal record/background neite an dah tur a ni lo, tiin a hrilh. 

ECI chuan kum 2018 khan poll candidate-te hnenah criminal record an neihte chu electronic leh print media-ah puangzar turin an lo ti tawh tih a sawi. Mahse hei hian awmzia a neih thui loh vangin, candidate-te chu criminal record neihte puanzar tir aiin political party-te chuan hetiang mite hi candidate atana dah lo mai tura ngen an ni zawk tur a ni, a ti. 

Justice RF Nariman leh S Ravindra Bhat awmna bench chuan ECI hnenah hian ram tana ṭha zawk tur, politics-a pawikhawihna nei tawhte inhnamhnawih tur venna tura ruahmanna a siamte chu kar khat chhunga siam turin a hrilh a ni.