India leh Canada-in high commisioner dah ṭhat remti

Prime minister Narendra Modi chuan G7 summit neih kar lakah Canada prime minister thar Mark Carney kawmin, kum hnih chhung ram pahnih inkar chhe tawh siam ṭhat dan turte an sawi dun.

Ram hruaitu pahnihte hian India leh Canada inlaichinna nghet siam chho leh tura hma lak an remtih bakah, ram pahnih khawpui Delhi leh Ottawa-a High Commissoner dah ṭhat leh an remti bawk a ni. Hei bakah insumdawn tawnna kawnga senior-level inbiakna neih chhunzawm, ram pahnih mipuite inpawh tawnna baka visa service siamṭhat chungchang pawh an sawi dun bawk. Clean energy, technology, digital infrastructure, artificial intelligence (AI), food security, leh mineral lamah pawh thawh dunte an rel bawk.

Foreign secretary Vikram Misri chuan meeting neih hma hian PM Modi chuan ram pahnih inkar chhe tawh tak siamṭhat leh leh tih ngheh a duh thu a sawi. High Commissioner dah ṭhat lehna tur atan hian thla leh tir lamah hma lak ṭan tum a ni.

Kum 2023 September thlaa Canada rama Nijjar thah a ni leh, Canadian-Sikh activist-te beih an nih chungchangah khatih laia Canada prime minister Justin Trudeau chuan India sorkar demin, a agent-te tih niin a puh a ni. Royal Canadian Mounted Police-in pawikhawihna thleng an chhuinaah home minister Amit Shah pawh an tel bawk. Hei vang hian Canada leh India inkar pawh a chhe zui hle. Nikum October thlaa Canada-in Indiah High Commissioner leh diplomat panga a hnawhchhuah hnuah an boruak hi a chhe zual bawk. India chuan Canada sorkar chhan letna atan India rama Canada palai rukte chu a hnawtchhuak zui ve bawk a ni.