Maharashtra sikulah Hindi third language atan hmang dawn

Maharashtra School Education Department chuan Thawhlehni khan Hindi ṭawng chu sikula zirlaite tan 'third language' anga hman a nih tur thu a puang a, Hindi ṭawng hi zir ngei ngei ngai huangah a tel tawh dawn lo a ni.

School education Department thuchhuah chuan Hindi chu Class I-V tan zir ngei ngei a ngai tawh dawn lo mai ni loin Hindi aiah an duh chuan ram chhung ṭawng ang an zir thei dawn tih a tarlang. Mahse ṭawng dang an zir duh a nih chuan class khatah zir ve duh a tlem berah 20 bawr vel tal an awm tlin a ngai thung ang. Ṭawng dang an zir duh zirtirtu tur an pek theih loh chuan online kaltlanga class neih pui turin sikul te tih an ni bawk.

State sorkar hian April thla khan Hindi chu Marathi leh English-medium sikula primary zirlai chin tan third language anga zir ngei ngei turin a ti. Mahse hei hian sawisel a tawk nasa hle a, eptu ṭangrual pawl Maha Vikaas Aghadi bakah rorellai BJP thlawptu, Raj Thackeray-a party Maharashtra Navnirman Sena ngei pawh a sawiseltu zingah an tel. Hei vang hian ni nag hnuah an thutlukna siam hi 'stay' a ni a, chief minister Devendra Fadnavis chuan an state-a sikulah chuan Marathi chauh chu ṭawng zir ngei ngei tur, compulsory language a nih tur thu a puang zui bawk a ni.

Hriattirna an tih chhuah tawh hi an ennawn hnuah, Thawhlehni khan ti chhuak thar lehin School Education Department chuan Hindi chu 'compulsory' ah a telh zui ta lo a, mahse Marathi chu zirlai zawng zawng tan compulsory subject a ni thung.

New Education Policy hnuaia Hindi zir telna tura tih chu Hindi ṭawng hmang lo state-te chuan an lo sawisel fo tawh a ni.