JD(U) general secretary-in a awmdan tur ngaihtuah dawn

Bihar-a rorellai, Janata Dal (United) general secretary Pavan Varma chuan party president leh Bihar chief minister Nitish Kumar-in a thutlukna a sawisel avanga a duh chuan an party a chhuahsan thei ang tia a sawina chu chhangin, a awmdan tur chu a la ngaihtuah dawn tih a sawi. 

Pavan Varma chuan Parliament-a CAB thlawp lama JD(U) vote a thlak avang leh, Delhi assembly inthlan neih tura BJP an thawhpui dawn avangin Nitish Kumar thutlukna hi na takin a lo sawisel tawh a ni. Varma chuan ram leh an party tana ṭha tur nia a ngaih chu a la sawichhuak zel dawn tih a sawi bawk. 

Varma chuan party president hnen aṭang hian Delhi-a BJP an thawhpuina chhan a zawhna chhanna a la dawng lo a, a chhan dan azirin a awm zel dan tur chu a la ngaihtuah dawn tih a sawi. Bihar-a ṭangrual sorkar siam turin BJP chu thawhpui mah se, Bihar pawn lama an thawhpui chhunzawm zel chu a hriatthiam loh thu sawiin, Nitish Kumar pawh hian a mimal tak chuan BJP leh RSS chu a mil lo niin a sawi a ni.