PM Modi-a'n Kisan Rail 100-na vai liam

Prime minister Narendra Modi chuan nimin khan Sangola, Maharashtra aṭanga Shalimar, West Bengal pan tur 'Kisan Rail' 100-na  a vai liam. PM chuan Kisan Rail chu ram chhunga loneitute thuam chakna tur leh, a sum lakluh tihpunna tura hmalakna pawimawh tak a nih thu a sawi. 

PM Modi chuan, "Ram puma loneitute ka lawmpui em em a ni. Covid-19 hripui leng karah Kisan Rail network chu thla li liam ta chhung khan zauh belh zel a ni a, tunah chuan rel 100 a nei ta a ni," a ti. 

Modi chuan Kisan Rail Service chuan ram chhunga cold supply chain pawh a tichak dawn tih sawiin, Kisan Rail chu cold storage facility kal kual thei ang a ni dawn a ni, a ti. Thlai leh thei chhe hma tak takte pawh a hun takah heng rel hmang hian phurh kual an nih theih tur thu a sawi. 

PM Krishi Sampada Yojana hnuaiah project hrang hrang 6,500 pawm a ni tawh tih Modi chuan a sawi a, heng zingah hian mega food park, cold chain infrastructure, agro-processing cluster-te an tel a ni. 

Kisan Rail hmasa ber hi August 7, 2020 khan Devlali leh Danapur inkarah tlan tir ṭan a ni a, tunah chuan rel 100 an nei ta a ni.