OROP vanga intihlum chhungte cheng vbch 1 pe dawn

Sipai bang pension pek dan, One Rank One Pension scheme sorkar laipuiin kalpui a tum dan duh loh vanga sipai bang intihlum, Ram Kishan Grewal-a chhugnte chu Delhi sorkar chuan cheng vaibelchhe khat a pe dawn.

Prime Minister Narendra Modi-aín OROP scheme kalpuina turin cheng vaibelchhe 5,500 pekchhuah a nih thu a sawi hnuah, Grewal-a hian Delhi-a sipai bang ṭhenkhatten nawrh an huaihawtna, Jantar Mantar-ah Thawhlehni zan khan tur inin a intihlum a ni. Sipai bang nawrh huaihawtte hian sorkar laipuiin OROP scheme kalpui a tum danah thil ṭhenkhat siamṭhat an phut a ni.

Kum 70 mi, Grewal-a hian sipai bang pension pek danah thil fel tawk lo a awm tih sawiin, a rank pui tam tak aiin pension a la tlem bik hle niin a sawi. A intihhlum dawn hian lehkha a hnutchhiah bawk a, a thihna chu sorkarin sipai bang pension a pek danah inngaihtuah harh phahna atana a hman a duh thute a sawi. Tur a in hnu hian damdawi-inah hruai ni mah se, chhan theih a ni tawh lo.

Delhi Chief Minister Arvind Kejriwal-a chuan Grewal-a chu martar anga an ngaih thu sawiin, a chhungte chhawmdawlna tur≠in cheng vaibelchhe khat an pek tur thu hi a sawi. Grewal-a chuan ram tana thawkin, ram tan a nun a hlan a ni, a ti. A intihhlum chhan anga OROP scheme kalpui a nih theih nan sorkar laipui nawrin ram pumin theihtawp a chhuah dawn tih a sawi.

Grewal-a ruang hi nimin khan Haryana state-a an khuaah halral a ni a, a vuina inkhawmah hian eptu hruaitu mi pawimawh tak tak an kal. Congress vice president Rahul Gandhi leh Delhi CM Kejriwal-te pawh an tel a ni.

Congress party thupuangtu, Randeep Surjewala chuan Grewal-a vuinaah hian defence minister Manohar Parrikar chu kal awm taka a ngaih thu a sawi a, sipai hotu hlui leh union minister AK Singh-aín rilru lam dik lo nia Grewal-a a sawi chhu a dem thu a sawi bawk.