Jaya-i’n hma a sawn zel

Tamil Nadu Chief Minister J Jayalalithaa-i chuan hma a sawn zel a, hna pawh a thawh chhunzawm thei thuai dawn niin an party AIADMK thuchhuah chuan a tarlang.

Jayalalithaa-i hi thla khat chuang zet Chennai-a Apollo Hospital-ah enkawl a ni tawh a, a dinhmun dik tak puanzar a nih mai loh avangin social media lamah dawt thu pawh a darh nasa hman hle a, ṭhenkhat chuan a thi tawh ang hialten an thehdarh a ni. Police-te chuan CM hriselna dinhmun chungchanga thu dik lo thehdarhtute hi an man a ni.

AIADMK party thupuangtu, Panrutty S Ramachandran chuan kum 68 mi, Jaya-i hi damdawi-inah enkawlna ṭha tak dawngin hma a sawn tawh hle tih a sawi a, state mipuite rawngbawl hna a thawk leh thuai thei dawn niin a sawi. Party hruaitu dang, CR Saraswathy pawhin doctor-te pawhin Jaya-i chu a ṭha tawh hle tih an sawi a, mahse la enkawl chhunzawm rih an duh a ni, a ti.