Ramchhung Lawrkhawm

Pakistan atangin India palai pariat ko haw dawn

External Affairs Ministry chuan Pakistan rama Indian diplomat pariat chu koh haw an ni dawn tih a sawi.

Pakistan media-te chuan an rama India palai awm zinga panga chu enthlatu nia puhin, hnawhchhuah an ni maithei niin an tarlang a, an hming leh thlalakte an pholang a ni. Hei vang hian sorkar laipui chuan palaite hi ko haw a tum nia sawi a ni.

Hemi hma hian Pakistan chuan Delhi-a Pakistan High Commission-a thawk official paruk chu a lo la chhuak tawh a ni. Heng official-te hi defence document lei rutu, Mehmood Akhtar-an India enthlak hna an thawhnaa an inhnamhnawih thu a lo sawi tawh a ni. Akhtar hi kar hmasa khan India aṭanga hnawhchhuah a ni.

Nepal-ah President Mukherjee a zin

President Pranab Mukherjee chu ni thum chamin Nepal ramah a zin a, kum 18 chhunga India President zinga Nepal ram tlawh hmasa ber a ni.

President Mukherjee hian Nilaini khan Nepal hi a thleng a, Nepal President Bidhya Devi Bhandari leh Prime Ministr Kamal Dahal Prachanda-te meeting a neihpui a, political party hrang hrang hruaitute a kawm bawk ang. Nimin khan President hian Hindu hmun thianghlim Pashupati Nath temple-ah puja a buatsaih. He temple hi India ram aṭangin Hindu mi sing telin kumtin an tlawh ziah ṭhin. Kathmandu University chuan President hi honorary DLitt degree a hlan dawn bawk.

J&K-a school-ahte zan lama vengtu dah turin ti

Jammu and Kashmir sorkar chuan an state-a tualchhung buaina a thlen hnuah zirna in hrang hrangte beih tel a nih avangin hemi venna atan hian zan lama school venghim tur dah turin a hriattir.

State sorkar chuan thuchhuah siamin, school hotute hnenah chuan zan lama school vengtu tur mi ruai tur emaw, a ṭul chuan zirtirtute pawh duty mai turin a ti. July thlaa Kashmir Valley-a tualchhung buaina a thlen hnuah India lak aṭanga inlakhran duhtute chuan school 27 an hal tawh a ni. School tam zawk hi zan lama hal an nih avangin thuneitute chuan zan lam duty siam tur hian school tinte chu a hriattir a ni.