UNESCO heritage site-ah Yoga Day lawm dawn

Ministry of Culture bultumin vawiin, Internationa Day of Yoga lawmna hun chu ramchhunga UNESCO heritage site leh cultural site hrang hrang hmun 100-ah hman a ni dawn.

Yoga Day lawmna pui ber hi prime minister Narendra Modi kaihhruainain Andhra Pradesh-a Visakhapatnam-ah neih a ni dawn a, state CM Chandrababu Naidu leh Dy CM Pawan Kalyan in an telpui ang. Union minister of culture and tourism, Gajendra Singh Shekhawat chuan Jodhpur, Rajasthan-a Mehrangarh Fort-a Yoga Day hmannaah a telpui dawn a ni.

Kumin hi Yoga Day lawmna ṭum 11 na tur a ni. Khawvel pumah thupui atan 'Yoga for One Earth, One Health' tih chu hman a ni ang.

United Nations General Assembly December 11, 2014-a neih ah khan June 21 hi 'International Day of Yoga' atana puan a ni. Hemi hnu hian India ah chauh ni lo, ram hrang hrangah hman zui a ni ta bawk. Yoga hian mihring taksa, rilru, leh thlarau hmasawnna a thlen nia ngaih a ni.

Yoga Day hmanna tura hmanlai hmun hlui hrang hrang thlan chhuah zingahGolconda Fort leh Salarjung Museum (Hyderabad), Humayun’s Tomb, Purana Qila leh Safdarjung Tomb (Delhi), Jallianwala Bagh (Punjab), Chittorgarh leh Kumbhalgarh Forts (Rajasthan), Leh Palace (Ladakh), Pari Mahal (Srinagar, J&K), Bekal Fort (Kerala), leh Hazarduari leh Cooch Behar Palaces (West Bengal) te an tel.