SCO Defence Minister meet-ah Rajnath Singh tel dawn

Defence minister Rajnath Singh chu June 25-27 a Shanghai Cooperation Organisation (SCO) Defence Ministers meet, Qingdao, China-a neih turah a tel dawn. He hunah hian Pakistan defence minister Khwaja Asif pawh a tel ve dawn bawk.

Kumina defence minister meet neihna hmun Qingdao hi China indo lawng hmunpui niin, conference neih kar lakah hian China leh Russia defence minister Admiral Dong leh Andrey Belousov te leh Rajnath Singh te chuan in kawmna hun an hmang nghal dawn bawk. Admiral Dong leh Singh-te hi ASEAN defence minister meet, nikum November thlaa Laos-a neih ah khan an lo in kawm tawh a, tun a inkawmna hi India leh Pakistan ni li chhung in nghirnghona thlen hnua an in biak lehna hmasa ber tur a ni bawk.

Defence minister hian SCO member ram Iran, Kazakhstan, Kyrgyzstan, Tajikistan, Uzbekistan, leh Belarus ram defence minister-te pawh a kawm dawn bawk a ni. Hetih laiin Pakistan defence minister nen inkawmna neih a ni ve dawn tih engmah tarlan a awm lo thung.

SCO member-te meeting-ah defence leh security huanga thawh hona leh SCO special Regional Anti-Terror Structure (RATS) kalphungte an sawi ho dawn a ni.

Kar hmasa khan India chu SCO-in June 13-a Israel-in Iran-a vantlang mipui awmna a beih chungchang na taka demna a tih chhuah aṭangin a inhnudawk a ni. He thuchhuahah hian Insrael chet lak dan chu international law palzut leh United Nation Charter palzamah an puh. Mahse, India chuan Heng SCO thuchhuah siamah hian a tel ve loh thu leh a ṭawmpui loh thu sawiin, thuchhuah hran a ti chhuak ve thung.