Iran aṭangin India mi 311 rawn thlen belh

India chuan Israel-Iran inkar buaina zual zel avangin Iran-a India mi awmte hruai haw hna a kalpui mekah, Pathianni khan special flight hmangin mi 311 chu Iran-a Mashhad aṭangin Delhi him takin an rawn thleng niin Ministry of External Affairs chuan an tarlang.

Iran aṭanga India mi hruai kir tawh zawng zawng hi mi 1,428 an tling tawh a, heng mite hi India-an kar hmasa aṭanga Operation Sindhu a kalpuina hnuaiah hruai haw an ni. Iran leh Israel hi missile leh drone tam tham tak hmangin an la in kah chhunzawm reng a ni. Israel nena an inbeih mek avangin Iran hian an airspace huam chin chu Zirtawpni liam ta aṭang khan a khuahkhirh ṭan a, India-in a mi leh sate a hruai hawna tur atan hian airspace a hawnsak a ni.

Pathianni vek khan Operation Sindhu hnuaiah Israel-a India mi awm zinga mi 160 chu Jordan kaltlangin hruai chhuah an ni bawk. Israel-ah hian India mi 40,000 vel an la awm angin an chhut.