NGO 11,000 chuang licence ti tawp

Ram chhunga Non-Govt Organisation 11,000 chuang, ram dang aṭanga ṭanpuina sum dawng ṭhinte chu licence renewal an dil loh avangin an licence tih tawp sak an nih thu Home Ministry chuan a sawi. Licence renewal ti tur hian June thla thleng kha hun hawnsak an ni.

Sorkar laipui chuan ram dang aṭanga sum dawng thei NGO awm zat chu nasa taka ti tlemin, 20500-ah a tihhniam tawh a ni. Kum hnih kalta khan Foreign Contribution Regulation Act (FCRA) 2010 hnuaia in register chu 42,500 an ni.

Home Ministry chuan NGO 10,000 te FCRA registration chu kum 2015 khan a cancel sak tawh tih a sawi a, licence a cancel sakte hi kum thum chhunga an sum hmuh zat thehlut lote an ni. Heng NGO tam zawk hi an ding zui tawh lo a, tam tak chuan FCRA registration hi an duh lo bawk.

Kumina licence renew lo pawl 11,319 zingah hian fahrah enkawlna leh zirna in enkawltu pawl 50 vel an tel. FCRA 2010 hnuaiah hian NGO-te chu kum nga danah an licence tinung thar zel tura tih an ni. Hetihlai hian NGO sector-a pawl lian ber, Voluntary Action Network India (VANI) chuan NGO chu hun pek belh turin sorkar laipui a ngen.