Delhi boruak bawlhhlawh vangin SC-ah petition thehlut

Delhi khawpui leh a chheh­vel boruak, meikhu leh tiauchhumin a bawh reng chu mihring hriselna atan a pawi thei nia sawiin, pollution level sang zel chu enfiah thuai tura ngenin Supreme Court-ah petition thehluh a ni.

Supreme Court chuan khawpui chhung boruak bawlh­hlawh chungchanga petition thehluh hi vawiin-ah ngaihtuah a tum.

Centre for Science and Environment (CSE) Director General leh Environment Pollution Control Authority (EPCA) member Sunita Narain-i chuan Delhi khawpui dinhmun chu a ṭha lo hle tih sawiin, boruakah chuan mihring hriselna tichhe thei tur hlauhawm tak a awm a ni, a ti. Supreme Court chuan Delhi sorkar chu boruak tih­thianghlim a nih theihna tura chak taka hma la turin a hriattir ngei a beisei thu a sawi bawk.

National Green Tribunal pawhin Delhi sorkar hnen
aṭangin khawpui boruak bawlhhlawh tiziaawm tura a hma lak dan chungchang report thehluh turin a lo dil tawh a ni. Nimin khan Delhi Lieutenant Governor Najeeb Jung chuan emergency meeting koin, Chief Minister Arvind Kejriwal-a kaihhruai sorkarin hma a lak dante an thlir.

Diwali lawmna atana halpuah leh halmawi nasa taka hal a nih hnuah, Delhi khawpui chu meikhu leh tiauchhum nasa takin a ni riatna atan nimin thleng khan a la bawh a, khawpui chhunga air pollution sang zel avang hian nimin
aṭang khan ni thum chhung atan school zawng zawng khar a ni a, in sak hna thawk mekte pawh chawlh lailawk tir an ni bawk.

State sorkar chuan mipuite chu pawn chhuak tam lo tur leh, a theih anga in lam aṭanga hna thawk turin a ngen. Pawn chhuakte pawh hmai tuamna hmang tura ngen an ni bawk.