Ramchhung Lawrkhawm

Hazare-a’n zu a do dawn

Eirukna dotu, Anna Hazare chuan zu khapna dan khauh tak siam a nih theih nan hma a la dawn tih a sawi.

ìZu vang hian chhungkua leh hmeichhiaten an tuar nasa a, khap bur a nih theih hi kan duh a niî tiin, zu zawrh leh khap a nih theihna turin a bei dawn tih Hazare chuan a sawi. Maharashtra-a zu khapna tur dan draft mek chu peihfel a ni ṭep tawh tih sawiin, peihfel a nih hunah Chief Minister Devendra Fadnavis hnenah hlan a ni ang, a ti. CM pawhin zu khapna dan khauh tak siam hi a thlawp niin a sawi bawk.

MP sorkarin jail-ah electric fencing hman tum

Madhya Pradesh sorkar chuan Bhopal jail aṭanga SIMI hel pariat an tlan chhuah hnuah, state chhunga jail zawng zawngah venhimna tikhauhin, jail hungna pawh electric kaltlang theihin a siam vek dawn. October 30 zan khan Bhopal Central jailaṭangin SIMI hel pariatte chu jail vengtu pakhat an thah hnuah an tlanchhuak a, police-te um zuiin a tukah khaw daiah tang tlanchhuakte hi an kaphlum vek a ni. Mahse tang tlanchhuakte kahhlum an nih danah hian sawi dan hrang hrang a awm a, police-te chuan tang tlanchhuakte hian silaia an kah avangin an bei let a, an kaphlum niin an sawi. Hetihlai hian mi ṭhenkhat chuan tang tlanchhuakte hian ralthuam an kawl lo niin an sawi thung.

J&K-ah sipaiten Hizbul firfiak kap hlum

Jammu and Kashmir-a Shopian district-ah security force leh firfiakte an inkap a, Hizbul firfiak pakhat kahhlum a ni a, sipai pahnihin hliam an tuar bawk.

Police official chuan security force-te hian thu an dawn bawhzuiin, Shopian district-a Wangam-ah firfiakte dap hna an thawk a, firfiakte nen hian an inkap zui ta niin sawi. Hizbul firfiak an kah hlum hi Sadam Hussain Mir, Chatripora Shopian-a cheng a ni. Security force-te chuan an beihna hmunah hian assault rifle pakhat, AK47 magazine panga, AK47 mu 119 leh hand grenade pakhat an man. Pathianni khan Poonch district-a Krishna Ghati leh Mendhar sector-a Line of Control-a Pakistan sipaite chuan silai hmetpuak lehin, India sipai pahnih an kap hlum a ni.