July 1 aṭangin rel chuan man ti sang dawn

Indian Railways chuan July 1 aṭanga hman ṭan turin rel chuan man ṭhenkhat a ti sang dawn a, mahse a punna tur erawh a sang lem lo. Kum 12 chhunga rel ticket man tih sana a la hniam ber ṭum a nih thu official chuan a sawi.

Official lamin an tarlan dangin, non-AC Mail leh Express train chuan man chu kilometre khatah paisa pakhat zelin tih san a ni dawn a, air-conditioned coach-ah kimometre khatah paisa pahnih zela tih san a ni bawk ang.

Suburban ticket leh monthly season ticket erawh tih pun a ni ve dawn lo a, ordinary second class ticket pawh km 500 chinah tih danglam a ni dawn lo bawk. Mahse km 500 chinah chuan kilometre khatah paisa chanve zelin tih pun a ni dawn thung a ni.

Ministry of Railways data-a a landanin, April 2024 leh March 2025 chhung khan rela zin hi khualzin vbc 715 an awm a, an zinga vbc 81 chu AC leh sleeper class-ah an chuang. Vbc 634 chu unreserved class passenger an ni. Indian Railways chuan 2024-2025 financial year chhungin khualzinte aṭangin Rs vbc 75,750 a la lut a ni. Tuna ticket man tih sanna aṭang hian RS vbc 1,500 - 1,600 hmuh belh beisei a nih thu Railway Board member hlui, M. Jamshed chuan a sawi.

July thla aṭang vekin Railway chuan ticket reservation system-ah Aadhaar OTP authentication a hmang tel tawh dawn a, hei hi ticket laknaa middleman lo inrawlh awm ṭhin venna atana a tih a ni. An official website leh mobile app aṭanga ticket lei turte tan Aadhaar nei tan chauh a theih dawn a, OTP a ngai tel zel tawh dawn a ni.