Israel leh Iran aṭanga India mi hruai kir chawl rih dawn

India-in Israel leh Iran inkar buaina avanga heng ram pahniha India mi leh sa hruai haw hna, 'Operation Sindhu' a kalpui chu inkahhai puan a nih tak avangin a chawlhsan lailawk rih dawn tih Tehran-a Indian embassy chuan a puang.

Indian embassy hian ram pahnih buaina vanga Mashhad-a 'help desk' mi puihna a siam, India mi za chuang hruai kir kawnga ṭangkai tak pawh a khar zui bawk.

Hruai kir runpui tawpsan a nih tak hnuah Indian embassy chuan Mashhad lam pan tumte chu an awmna hmuna awm rih turin a chah a, boruak awmdante ngaichang turin a ti. Operation Sindhu hmang hian Iran aṭangin India khua leh tui 2,295 leh Isarel aṭangin mi 594 hruai haw an nih thu Ministry of External Affairs (MEA) chuan Thawhlehni khan an tarlang.

Inkahhai puan ni, Thawhlehni khan Israel aṭangin mi 161 chuan India rawn thlengin, heng mite hi Israel airport a hman theih loh avangin Jordan khawpui Amman aṭangin an rawn thlawk a ni. Indian Air Force thlawhtheihna, C-17 aircraft hmangin India mi 268 chu Sharm-el-Sheikh, Egypt aṭangin India rawn panpui an ni bawk.