SCO thuchhuah turah Rajnath Singh-a'n hming ziak duh lo

Shanghai Cooperation Organisation (SCO) Defence Ministers’ meeting, Qingdao, China-a neih mekah India aiawh, defence minister Rajnath Singh chuan thuchhuah inṭawm siam turah a hming a ziak ve duh lo. Thuchhuah an siam hi India-in firfiak pawl chetna dodalna leh ramri venhim kawnga a dinna a ti nep thei dawn niin a sawi.

Rajnath Singh chuan SCO meeting-a thu a sawiah, April 22 a Pahalgam, Jammu and Kashmir-a Lashkar-e-Taiba nena inzawm ‘The Resistance Front’ (TRF) te beihna avanga pawisawi lo khualzin 26 thihna thleng chungchang sawi lang leh a. Heng pawl hi UN pawhin firfiak pawl anga a chhal tawh niin a tarlang.

Singh chuan thuchhuah inṭawma a hming a ziah duh loh chhan sawiin Pakistan leh China-a helpawl chetnate tarlan a nih laia Pahalgam-a firfiak pawl pawikhawihna tarlan a nih ve loh thu leh, firfiak pawl chetna rapthlak tak aṭanga mi dang lakpen tumna ang chauh a nih thu a sawi lang a ni.

Defence minister chuan India-in firfiak pawl chetna do tura hmalakna thar a duan thute sawiin, summit-a tel member ramte pawh heng pawikhawihna thleng ṭhin laka venhimna khauh zawk a, firfiaka chetna thleng ṭhin nuaibo dan tur ngaihtuah ve turin a chah zui a ni. Rawlrala chetna leh remna leh muannate chu hmun khatah an luangza theih loh thu uar takin a sawi. Firfiak pawl chetna chungchanga an inlungrual theih tak loh avangin thuchhuah inṭawm siam tum chu tih hlawhtlin a ni ta lo a ni.