CBSE-in 2026 aṭangin Class 10 board exam ṭum 2 buatsaih dawn
Central Board of Secondary Education (CBSE) chuan kum 2026 academic year aṭangin Class 10 board examination chu kum khatah ṭum hnih zel a buatsaih tawh dawn.
Thuchhuah an siamah, CBSE chuan 'main' board examination hmasa zawk hi 2026 February thla laihawlah neih a ni dawn a, exam vawi hnihna hi May thlaah neih a ni dawn tih a sawi. Tih dan ṭhanah chuan CBSE Class 10 leh 12 board exam hi hun in angah neih ṭhin a ni a,mahse academic session thar aṭang chuan Class 10 hi an exam hmasa tawh ang a, result pawh puan hmasak a ni ang. Class 10 exam tih hma a nih chhan hi board exam vawi hnihna, May thlaa neih tur atana zirlaite inbuatsaihna hun siamsakna tura tih a ni.
CBSE chuan board exam buatsaih dan chungchangah kumin March thla khan mipui ngaihdan an lak thu sawiin, hemi behchhan hian thutlukna hi siam a ni, a ti. Class 12 zirlai tan pawh he scheme hi hman chhoh a la nih ve mai theih thu a tarlang bawk.
Kum khata board exam vawi hnih buatsaihah hian, a vawi khatna chu Class 10 zirlaiten an hmachhawn vek a ngai dawn a, main examination angah ngaih a ni dawn tho a ni. Exam vawi khatnaa pass-te chuan May thlaa exam vawi hnihnaah hian subject pathum - Sciene, Maths, Social Science or language ah an mark tih ṭhatna turin an exam nawn leh thei ang. Hei bakah exam vawi khatna a subject pakhat emaw, pahnih emaw fail-te chuan exam vawi hnihna hi compartment category hnuaiah an hmachhawn leh thei dawn bawk. Mahse subject pathum chin fail-te chuan exam vawi hnihna hi an hmachhawn thei dawn lo a, zir nawn lehin a kum lehah main exam-ah an ṭhu leh thei chauh ang.
Class 10 board exam hmasa zawk result hi April thlaa tih chhuah tur niin, a vawi hnihna hi June thlaa tih chhuah tur a ni. Exam hmasaa pass, a vawi hnihna exam nawn duh lote chuan exam hmasaa an result chu an ring tlang thei dawn a, result-te hi DigiLocker kaltlangin en theih a ni ang. Mahse official marksheet leh merit certificate chu board exam vawi hnihna result puan hnuah pek chhuah a ni chauh dawn a ni.