Himachal Pradesh-ah sabereka khuangkaih vangin mi 2 thi

Himachal Pradesh-ah Nilaini khan ruah baw hawk sur vangin Kangra leh Kullu district-ah sabereka khuangkaih a thleng a, mi pahnih an thih bakah chin hriat lohin mi dang eng awm zat an awm bawk niin Ningani khan official ten an tarlang.

Chhiatna thlenna Kanga district-ah hian Indira Priyadarchini Hydroelectric project site-a thawktu mi 15 aṭanga 20 vel bawr te chu sabereka khuangkaih hian a lak bo tel an rin thu thuneitute chuan tarlangin, mi pahnih an thi tih erawh finfiah an ni tawh thung. Hriat theih chinah Kullu district huam chhunga Rehla Bihal-a cheng mi pathumte chu bo zingah an tel.

Chhanchhuah hna thawk tur hian State Disaster Response Force (SDRF) team hnih leh home guard aṭanga team siamte an thawk chhuak nghal a, anni bakah National Disaster Response Force (NDRF) team chu chhanchhuah hna thawk tur hian koh an nih thu Deputy Commissioner (DC) Hemraj Bairwa chuan a sawi.