RSS-in Constitution an pawm ngai lo - Congress

Congress party chuan rorellai, Bharatiya Janata Party (BJP) ideological mentor, Rashtriya Swayamsevak Sangh (RSS) senior member-in Indian Constitution-a Preamble-a 'secular' leh 'socialist' tih thu awm paih a duh thu a sawi chu na takin an chhang let. RSS chuan Constitution hi an pawm ngai lo niin an sawi.

RSS general secretary Dattatreya Hosable chuan Ningani khan Preamble-a thu pahnih, 'secular' leh 'socialist' tih awm chu sawi ho ngai tak a ni tiin, heng thumal pahnihte hi Preamble siam tirhah khan telh an ni lo a; Congress sorkar lai 1976-a 42nd Amendment-ah telh an ni chauh a ni, a ti. Hei vang hian Preamble hi ennawn leh, he thumal pahnih hi paih a duh thu a sawi.

Hosabale thusawi hi Congress hruiatu, Jairam Ramesh chuan nimin khan X-ah chhangin, RSS chuan Constitution chu an pawm ngai lo a, founding father - Dr BR Ambedkar leh prime minister hlui Jawaharlal Nehru te an bei fo a ni, a ti. Dr Ambedkar-a hmathlir, India rama mipui rorelna huang zau tak a neihte tih chhiat tumah an puh bawk.

"RSS leh BJP chuan Constitution thar siam an duh thu an sawi fo a ni. 2024 Lok Sabha inthlan neih dawna Modi campaign-ah pawh sawi a ni a, mahse mipuite chuan an lo hnawlsak a ni. Mahse RSS kaltlangin Constitution innghahna tlak tura nawrna hian siam a ni leh zel a ni," tiin Rmaesh chuan November 25, 2024 khan hetihlaia chief justice of India chuan secularism chu Constitution innghahna bulpui a ni tia a sawi kha RSS hotu hian chhiar nawn leh tura a duh thu a sawi a ni.