Thla 6 chhunga hri kai hmuh tlem ber ni thleng

India ram pumah Thawhṭanni khan Covid-19 kai hmuh chhuah thar mi 16,432 an awm a, hei hi thla ruk chhunga ni khatah hri kai hmuh chhuah thar an tlem ber ni a ni. December thla chhunga ni khata hri kai thar mi 20,000 aia tlem an nih ṭum thumna a ni bawk. 

Ram pumah Covid-19 kai hmuh tawh hi mi 1,02,24,303 an tling tawh tih union health ministry chuan a tarlang. Thawhṭanni khan hripui vanga thi mi 252 awm belh lehin, he hri thihpui hi mi 1,48,153 an awm tawh a ni. 

Hri kai enkawl dam tawh hi mi 98,07,569 awmin, recovery rate hi 95.92% a ni tawh a, hetih lai hian hripui thihpui, fatality rate chu 1.45% a ni thung. A zawnin ni riat chhung chu hri kai enkawl mek nuai thum aiin an tlem tawh bawk. 

India rama Covid-19 kai hmuh chhuah hi August 7 khan mi nuai 20 an tling a, August 23-ah nuai 30, September 5-ah nuai 40-ah kaiin September 16-ah nuai 50 an tling. September 28-ah nuai 60 an tling chho tawh a, October 11-ah nuai 70, October 29-ah nuai 80, November 20-ah nuai 90 leh December 19 kha hri kai hmuh tawh hi vaibelchhe khat an tling tawh a ni.