Rath Yatra festival-a inpawng nekna thlengah mi 3 thi

Odisha-a Rath Yatra festival hmanaah nimin zing khan Puri-a Gundicha Temple bulah inpawng nekna thlengin mi pathum an thi a, mi 50 chuangin hliam an tuar.

Temple-a serh leh sang hun hmannaa tel turin zing dar 4 velah mi sing tel an pungkhawm a, he hun hmanna atana hmanraw pawimawh phurtu truck pahnih chu mipui awmkhawmnaah hian tlan lutin, pungkhawmte hi an innek buai phah ta nia sawi a ni. Mita hmutute chuan mipui tam tak an punkhawmnaah hian police lam aṭangin ruahmanna felfai tak a awm lo niin an sawi.

Odisha chief minister Mohan Charan Majhi chuan vanduaina thleng chu pawi a tih thu saiwin, thi chhungte chu Rs nuai 25 ṭheuh pek an nih tur thu a sawi. Venhimna lam felfai tawk lo chu ngaihdam theih a ni lo tiin, chhui chian a nih tur thu a sawi. Puri DCP Bishnu Charan Pati leh Police commandant Ajay Padhi te chu a suspend nghal a, Collector Sidhart S Swain leh SP Binit Agarwal te chu transfer nghal an ni bawk.

State sorkar chuan Director General of Police (DGP) Y B Khurania chu vanduaina thlenna hmunah thil awmdan enfiah turin a tir nghal a i. Nimina inpawng nekna a thlen hma, kar liam ta Inrinni khan mipui pungkhawm tam leh khaw lum lutuk avangin mi 750 chuang an chau a, damdawi-inah hruai an ni bawk. An zinga 12 chu ICU-ah dah an ngai a ni.