J&K-a Pakistan mi man firfiak pawl kaihruaitu tih finfiah

Jammu and Kashmir ramri, Line of Control (LoC) bul Poonch leh Rajouri district inkar ramri aṭangin Pathianni khan Pakistan mi, India-a luh ruk tum an man chu firfiak pawl kaihruaitu (guide) a ni tih finafiah a nih thu nimin khan official-te'n an sawi.

An mi man hi Mohammed Arif tih finfiah tawh niin Jaish-e-Mohammad (JeM) firfiak pali awmna group kaihruaiin India rawn luhruk an tum lai chu sipai duty laiin an lo man a ni. A ruala tel ve firfiak dangte hi man a nihna bul khamah zuang thlain Pakistan lamah hliam nei chungin an kir leh hman niin official chuan an tarlang bawk.

Arif hi Pakistan-a Datote thingtlang khuaa Pakistan awp Kashmir (PoK) huamchhunga cheng niin, Hajura post Gambhir huam chhung aṭangin Sipai Ace of Spade division te'n an lo man a ni. Arif-a hnen aṭang hian mobile phone leh Pakistan pawisa, cheng 20,000 an man sak bawk.

Thu zawhfiah a nih hnuah Arif chuan Line of Control huam chhunga cheng an nih avangin a ram leilung a hre chiang a, hei vang hian Pakistan sipaite thupek angin firfiak pawlte chu India-a lut ru tur hian a puih ṭhin thu a sawi.