'Constitution tih danglam tumna Congress in a bei let zel ang' - Kharge

Congress party president Mallikarjun Kharge chuan ram danpui, Constitution tih danglam tumna a awm a nih phawt chuan Congress party chuan a theihna zawng zawng hmangin a bei let zel dawn tih a nimin kha a sawi.

Tun hnaiah RSS general secretary, Dattatreya Hosabale-a'n Preamble-a 'socialist' leh 'secular' tih ṭawngkam telh paih a duh thu a sawi chungchang a chhannaah Kharge hian he thu hi a sawi a ni.

Bengaluru-a a chenna ina chanchinthar lakhawmtute a kawmnaah, Congress Presidnet chuan Hosabale chu sawiselin zalenna, lungrual taka khawsak khawm, inpumkhatna leh intluktlanna te chu a duh lo a ni, a ti. Hosabale thusawi chu a mimal duh dan chauh ni loin, RSS duh dan a ni tiin a sawi bawk. RSS chuan an mi leh sate chu inthliarhranna awmte ti bo a, ram inpumkhatna tura theihtawp chhuah turin a ti tur a ni, a ti.