Pahalgam beihna kha 'economic warfare' kalpuina a ni : EAM

US tlawha zin mek external affairs minister S Jaishankar chuan kumin April 22-a Pahalgam-a firfiak pawl beihna thleng kha 'economic warfare' a ni tiin, Kashmir-a khualzin tlawh nasat hmunte tih chhiat tumna a nih thu a sawi.

EAM chuan Newsweek CEO Dev Pragad in a kawmnaah he thu hi sawiin, India-in Pakistan firfiak pawl beihna chhan letna tih tawp nana nuclear hmanga beiha vauna pawh a en liam mai mai dawn loh tih a sawi bawk. US-a cham mek, Jaishankar hian nimin khan Washington DC-a Quad Foreign Minister Meeting ah a tel. UN-a India permanent mission-in UN Headquarters-ah 'The Human Cost of Terrorism' exhibition a buatsaih pawh a hawng nghal bawk. He exibition kaltlang hian khawvel hmun hrang hranga firfiak pawl beihna thleng rapthlak tak tak, Pakistan-a in nghat firfiak pawl inhnamhnawihna neih dante tarlan a ni.

Jaishankar chuan India-in firfiak pawl chu mitin tana hnawksak a nih tih chu a ngaihdan nghet tak a nih thu leh, eng ram mahin hmanrua atan an hmang tur a ni lo tih a sawi. India leh US in sumdawn tawnna chungchang pawh sawiin India leh US chuan a hmawr an bawk hnai tawh niin a sawi.