Telangana-a factory puaka thi 44 tling tawh

Hyderabad, Telangana-a Thawhṭannia Sigachi Industries Pvt. Ltd factory-a thil puak vanga thi zat chu nimin zing thleng khan mi 44 an tling tawh. Ruang hmuh belh zel a nih avangin thi zat pawh hi an la punchhoh a rinawm.

Ruang an hmuh belh tam zawk hi thil puak na tak vanga production unit building chimiin a delhte an ni a, ruangte hi an kang chhe nasa hle niin an sawi. Chhiatna thlenna hmunah hian zawnchhuah hna hi thawh chhunzawm zel a la ni. Hetih lai hian chhiatna thlenna bulhnaia awm mi 12 chu chin hriat lohin an la awm bawk.

Thawhṭanni zan khan damdawi-in lam thawktute chuan ruang an hmuh tawh zinga 20 chu DNA test neih tawhin DNA hmanga finfiah theihte chu an chhungte hnenah hlan nghal zel an ni dawn a ni. Official-te chuan chhiatna thlen lai hian hnathawktu mi 143 bawr an awm niin an sawi.

Telangana chief minister A. Revanth Reddy chuan factory-a chhiatna thlenga hnathawktu thi chhungte chu zangnadawmna, Rs vaibelchhe 1 ṭheuh pek an nih tur thu a puang. Hliam tuar na zualte pawh Rs nuai 10 ṭheuh pek an ni dawn bawk. Hnathawktu thi chhungte hnenah hnenah hian Rs nuai khat ṭheuh leh, hliam tuarte hnenah Rs 50,000 ṭheuh chu pe nghal turin official-te hriattir an ni bawk.

Chief Minister bakah health minister C. Damodar Raja Narsimha, labour minister Vivek Venkataswamy, IT and Industries minister D. Sridhar Babu, revenue minister Ponguleti Srinivas Reddy te chuan nimin khan chhiatna thlenna hmun factory hi tlawhin, chhanchhuah hna thawh mekte an enpui bawk. Ruang lak chhuahte post morten leh DNA sample lak khawmnaa pui turin, Osmania General Hospital-a special forensic team pawh tirh an ni tawh bawk a ni.