US-in India hnena ralthuam hralh tur hmabak tih fel thuai beisei

US tlawha zin mek external affairs minister S Jaishankar leh US defence secretary Pete Hegseth te chu Thawhlehni khan Pentagon-ah in kawmin, Hegseth chuan US-in India hnena ralthuam a hralh tur la tangkhangte chu tih fel thuai beisei a nih thu a sawi.

Jaishankar leh Hegseth te hian defence huanga India leh US thawhdunna neihte kalpui chhunzawm zel dan turte an sawi dun a ni. Department of Defence (DoD) chuan ram pahnihte hi Indo-Pacific huamchhung venhimna kawngah an inlungrual hle niin a tarlang a, Hegseth leh Jaishankar hian India-U.S. Defence Acceleration Ecosystem Summit neih tur chungchang pawh an sawi dun tih a sawi bawk.

Jaishankar chuan defence huanga ram pahnih in laichinna chu an thawhdun tawhna zinga lian tham ber a nih thu a sawi. India leh US thawhdunna chu a ṭhan chhoh zel thu sawiin, ram pahnih tan chauh ni lo, khawvel huap pawha ṭangkai a nih thu a sawi bawk.