India-ah darkar 24 chhungin Mi 1,990-in Covid-19 kai

India ramah Inrinni  khan darkar 24 chhungin Covid-19 hri kai thar mi 1,990 an awm a, ni khata hri kai an tum ber ṭum a ni. 

Union health and family welfare ministry-in nimin zing dar 8-a a tarlan dan chuan India ramah hri kai hi mi 26,496 an awm tawh a, chung zinga mi 5,804-te chu enkawl dam tawh niin, hri vanga thi hi mi 824 an awm tawh bawk.

India ram state zingah Maharashtra-ah hri kai hi an tam ber a, mi 7,628-in an kai tawh a ni. A dawtah Gujarat an awm a, anni state-ah hian hri kai hi mi 3,071 an awm tawh bawk. Delhi-ah hian mi 2,625 an kai tawh a, Rajasthan-ah mi 2,083 in an kai a, Madhya Pradesh-ah hian mi 2,096-in an kai tawh bawk. 

Heng state leh UT-te hi India rama hri darh zualnate an ni.

Maharashtra-ah hian hri vanga thi hi tam berin, mi 323-in he hri hi an thihpui tawh. Gujarat-ah mi 133, Madhya Pradesh-ah mi 99, Delhi-ah mi 54 leh Andhra Pradesh-ah mi 31-te an thi tawh bawk.

Kar kal ta Inrinni khan ministry of health & family welfare joint secretary Luv Aggarwal chuan ram chhunga hmun 307 chu green zone-a dah a nih thu a sawi. Heng green zone-ahte hian ni 28 emaw a aia tam emaw chhungin hri kai thar an awm lo a ni. District 297 chu orange zone-a dah a ni a, he orange zone huam chhunga awmte hi hri kai tam lohna hmunte an ni.

Health secretary Preeti Sudan chuan ram pumah Epidemic Diseases Act hman a nih mek thu sawiin, he act hi healthcare service-te humhim nana hman a nih thu a sawi bawk.