BRICS Summit hmang turin PM Modi-an Brazil thleng

Ram panga tlawha zin chhuak mek, prime minister Narendra Modi chuan a ram tlawh palina tur leh ni li chhung cham turin Inrinni liam ta khan Brazil a thleng. Brazil-ah hian Rio de Janeiro-a BRICS Summit, July 6-7 chhung neih turah a tel nghal dawn.

Kumina BRICS Summit-ah atir aṭanga tel ram Brazil, Russia, India, China leh South Africa bakah member thar Egypt, Ethiopia, Iran, Saudi Arabia leh UAE te an tel dawn a ni. PM hian BRICS summit a hman bakah hian state visit neiin Brasilia a tlawh nghal dawn a, India Prime Minister-in kum 60 hnua a tlawhna hmasa ber tur a ni.

Modi hian Brazil-a a cham chhung hian Brazil president Javier Milei kawmin, in sumdawn tawnna bakah defence, critical minerals, pharmaceutical, energy leh mining sector huanga thawh dunna turte an sawi dun dawn a ni. Summit karlakah hian ram hruaitu hrang hrangte a kawm bawk ang.

PM Modi hian Brazil a tlawh hma hian Argentina tlawhin Argentina president Javier Milei nen Inrinni khan meeting an nei a, India-Argentina insumdawn tawnna tur chungchang an sawi dun. Defence, security, energy, leh minerals huangah ram pahnihte thawh dunna tih zauh an tiam bawk.

Modi hian Ghana leh Trinidad and Tobago a tlawh tawh bawk a, Brazil-a hun a hman zawhah a hmawr bawkna turin Namibia a pan leh dawn a, hemi zawh hian India panin a rawn kir tawh dawn a ni.