Chhattisgarh-ah Kristian-ten inkhawm an la ralṭi

Chhattisgarh-a Dhamtari district-a Borsi khuaah June 8 khan Penial Prayer Fellowship worship service inkhawm lai chu Hindu kalfawr hoin luh chilhin inkhawmte chu an rik rap bakah an vau a, Bible-te halsak an nih thu Pastor Wakush Sanu chuan a sawi. He thil thleng vang hian Kristiante hian tun thlengin an la ralṭiin, inkhawm pawh an la hlau tih a sawi.

Pastor Sanu chuan inkhawmna hmun beih a nih chungchangah Maganlodh police station-ah complaint a thehlut a, mahse thawktu lamin mumal taka an ziah luh duh loh thu a sawi. Officer-te chuan complaint ziah luh a nih hmain thil thlen dan chu chhui chian phawt a ni ang, ti chauhin an lo chhang niin a tarlang.

Hindu kalfawrte hian in khawmlai hi tih luihna hmanga luh chilhin, hmanruate kengin inkhawmte hi an ti buai a, biak-in chhungah 'Jai Shri Ram' tia an aurual thu Pastor Wakish chuan Morning star News hnenah a sawi. Buaina siamtute hian inkhawm ti tawp tura an hrilh bakah inkhawmna hmun bungrua eng emaw zat an ti chhia a,Bible leh lehkhabu dangte pawh an ti chhe tel bawk.

Kristiante beihna hi a thlen vawikhatna a ni lo a, kum 2024 pawh khan Hindu kalfawrten hetiang chiah hian biak-ina Kristian inkhawm lai chu an lo ti buai tawh niin Pastor chuan a sawi.