Mann ki Baat Ramzan-a ṭawngṭai nasa zual turin PM-in a ngen

Prime minister Narendra Modi chuan nimin khan thla tina Radio-a a hun hman ṭhin Mann ki Baat programme-ah thu sawi lehin Ramzan hman ṭan mekah chuan mipuite chu a hma aia nasa zawka ṭawngṭai turin a ngen. 

Ramzan thla hman mek chu dawhtheihna leh inlungrualna entirna hun atana hmang tur leh midang hlata awm chung zela hmang turin a ngen a ni. Hripui leng mek chuan kût hrang hrang kan hman dante pawh a thlak zo tawh tih a sawi bawk. 

"Thla thlianghlim Ramzan chu a inṭan leh ta. Ramzan hmasa lawm lai kha chuan tumahin kumin Ramzan-ah hian harsatna nasa tak a thleng ang tih an ring lo. Mahse tunah chuan khawvel pumin he harsatna hi a hmachhawn a, chumi vang chuan Ramzan chu dawhtheihna leh inlungrualna lantirna hun remchang a ni. Tun ṭumah hian a hma aia nasa zawka kan ṭawngṭai a ngai a ni," a ti. Ramzan hi April 23 aṭang khan a inṭan a, May 23 thleng a awh ang.

PM chuan tualchhung thuneitute inkaihhruaina dan siam zawm a nih phawt chuan hripui leng dona chuan nghawng ṭha tak a nei dawn tih a chian thu a sawi a, "Tun dinhmunah chuan kawngpui, mihring chenna hnun leh bazarahte pawh midang hlata kan awm a ṭul rih a ni. Tualchhung hruaitu, an mite midang hlata an awmna tur leh ina an awmna tura hmalatute chungah pawh lawmthu ka sawi a ni," a ti bawk. 

PM Narendra Modi chuan mamawhte tana ei tur pek dan chungchangah te, ration pek dan te, lockdown zawm ṭhat dan kawngte leh damdawi-ina medical equipment pek dan kawngte rampum chu a ṭangrual a ni, tiin a sawi. Digital Platform covidwarriors.gov.in chungchang sawiin, hetah hian mithiam hrang hrang vaibelchhe 1.25 chu hun rei lote chhungin an inthlunzawm hman thu a sawi.

Pathiannia Narendra Modi Mann ki Baat programme hi a vawi 64-na a ni.