Bazar leh mall la khar a ni ang - Arvind Kejriwal
Kar kal ta Zirtawpnia ministry of home affairs (MHA)-in hmun ṭhenkhata dawr hawn a phal hnuah, Delhi chief minister Arvind Kejriwal chuan nimin tlai khan Delhi-a dawr, bazar leh mall-te chu la khar vek tur a nih thu a sawi.
Bungraw pakhat ang chi chiah zawrhna dawrte chu hawn phal a nih tur thu Kejriwal chuan video conference kaltlangin a sawi a, hri kai hi Delhi-ah hian a la pun chhoh zel avangin thil dang chu khar rih turin a la ti a ni.
Kar liam ta khan Kejriwal chuan sorkar laipuiin inthlahdulna ṭhenkhat siam mah se Delhi-ah chuan inthlahdul a la theih loh thu a sawi. Nimina video conference kaltlanga Kejriwal-a'n thu a sawi naah, Delhi-a market, market complex leh mall-te chu khar chhunzawm a ni dawn tih a sawi a, khuahkhirh ngai zual (containment zone) hmun a khuahkhirhna an kalpui chhunzawm zel tur a nih thu a sawi bawk. Delhi-ah hian containment zone 95 a awm.