Covid vaccine leh heart attack-in in zawmna nei lo - Medical Report

Karnataka state sorkarin tun hnaia heart attack thleng tam chungchang zir chiang tura a din, expert committee report chuan Covid-19 vaccine leh heart attack-in in zawmna a neih loh thu a sawi.

Chief minister Siddaramaiah chuan tun hnaia Hassan district-a heart attack vanga mi 20 chuang thihna thleng chu Covid vaccine nen inzawmna nei niin a sawi a, khawvel ram hrang hrangah pawh heart attack tam chho zel chu Covid vaccine vanga nia ngaihna pawh a tam hle a ni, a ti. Covid vaccine an pawm hmasa lutuk leh mipuia an pe chhuak hma lutuk chu heng thihna thlen phahna pawh hi a ni thei a ni, tiin a sawi.A thusawi hian sawi zui pawh a hlawh hle.

State sorkarin heart attack thlen tam chhan chungchang zirchiang tura a din, expert committee chuan Bengaluru-a Jayadeva Hospital-ah zirchianna hi an nei a, an zirchiana aṭangin heart attack-a thite chu Covid vaccine vang a ni tih finfiahna pakhatmah a awm lo tih an sawi. Heart attack thlen thei hlauhawmte chu mei zuk, diabetes leh hypertension te a la ni reng tih sawiin, heart attack vanga thi tam ber pawh hetiangin a thlen tih zirchianna an neih chuan a tarlang.

Expert committee te sawi bakah, Indian Council of Medical Research leh National Centre for Disease Control ten zirchianna an neihah heart attack thlentu chungchangah a hmaa zirchianna an lo neih tawh aṭangin thil danglam a awm chuang lo tiin, Covid vaccine vang a ni lo tih an lo sawi tawh bawk niin Health Ministry chuan a tarlang ve bawk.

ICMR-a National Institute of Epidemiolog director, Dr Manoj Murhekar chuan, "Hospital 50-ah damlo 800 te chungchang kan zirchiang tawh a, hengah pawh hian heart attack vanga thi leh covid vaccine an lak nen inzawmna a nei lo tih kan hmuchhuak a ni," a ti.