NMC-ah member leh chairperson awm lo

Ram chhunga hnam leh sakhaw tlem zawk (minority community) himna leh humhalhna ngaihtuahtu, National Commission for Minorities (NCM) chu April 2025-a Chairperson Iqbal Singh Lalpura a chawlh hnuah a thlaktu ruat a la ni lo a, chairperson leh member nei loin a awm mek.

Chairperson telin Commission member pangate chu nikum December thla aṭang khan an chawl chho a, mahse tun thlengin member thar ruat an la awm lo.

NCM hi Ministry of Minority Affairs hnuaia mi niin, Chair Person leh Vice-Chairperson telin member pasarih an awm tur a ni. National Commission of Minorities Act, 1992 hnuaiah commission member atan hian hnam/sakhaw tlem zawk - Muslim, Kristian, Sikh, Buddhist, Parsi, leh Jain aiawh pakhat ṭheuh ruat theih an ni.

Tun ṭum hi NCM a hmun ruak hnawh khat loa dah ruah a nih reng vawi khatna a ni lo. Kum 2017 khan Chairperson leh member ṭhenkhat ruat kim lohin thla eng emaw zat alo awm tawh a, kum 2021 khan Delhi High Court chuan sorkar laipui chu NCM post hi a hnawhkhah tir tawh a ni.

NCM member leh Chairperson ruat chhuah tih khawtlai hian zirna lama hnam leh sakhaw tlem zawkte dikna chanvo humhim kawnga thawktu, National Commision for Minority Education Institution (NCMEI) thlengin a nghawng a ni. NCMEI hi sorkar laipuiah minority educational institution tan advisory body angin a awm bawk. Thawktu ruat tharna tur tih khawtlaina chhanah sorkar lam aṭangin thuchhuah siam leh hmalak dan tur sawi a la awm lo.