Pawisa tih thih avangin Sorkar laipui lakah PIL theh lut

Prime Minister Narendra Modi-a kaihhruai sorkar laipui­in Rs 500 leh Rs 1,000 note a tih thih avangin Supreme Court-ah PIL pahnih theh luh a ni.

PIL theh luttute hi lawyer, Vivek Narayan Sharma leh Shangam Lal Pandey-te an ni a, sorkar chu pawisa a tih thih hnua sum thlengna tura hun pe tam tawk lo leh, mipuite buaina leh chiaina thlenah an puh.

"Prime Minister-in black money, pawisa lem leh firfiakten sum an chhekkhawl beih letna atan pawisa note tih thih a nih thu sawi mah se, he thil hian ram mipui tluklehdingawn 1.25 tan harsatna a thlen a, he thil hi mipui nawlpuite tan chuan 'Economic Terrorism' a ni" tiin PIL-ah hian an tarlang.

Sharma chuan sorkar laipui chu a thupek tihchhuah tawhte a sut a nih loh pawhin, pawisa tih thihte thleng hun tam zawk siam sak turin a phut.

Phek 39-a chhah PIL thehluhah hian sorkar laipui chu scheme a kalpui dan tur zawtin, mipuite hun pe loa thupek a tihchhuah phut chungchangah constitutional rule of law zawm loah a puh bawk.

Pandey pawhin pawisa tih thih a nih avanga mipui nawlpuiten harsatna an tawh hrang hrangte a tarlang a, he thupek hi sut leh a nih ngei a beisei thu a sawi.

Telangana state-a loneitu nu pakhat, kum 55 mi chu pawisa tih thih a nih vang hian, a pawisate a chan vek dawn nia ngaiin a intihlum. He thil hi Shanigapuram khuaa thleng a ni a, police-te chuan hmei­chhia intihlum, K Vinoda leh a pasal Uppenderiya-te chuan thla thum liamta khan an ram, acre 12-a zau an hralh a, ram hralhna man cheng nuai 55 chu a pawisa faiin an dawng a ni. Hmun dangah ram lei an tum avangin an pawisa chu bank-ah dah loin inah an kawl niin an sawi. Mahse Rs 500 leh Rs 1,000 note tih thih a nih thu an hriat hian an pawisa kawl chuan hlutna a nei tawh lo nia ngaiin, Vinoda rilru na chu a inawkhlum ta a ni. He thil thleng chungchangah hian police-te chuan thubuai an ziak lut nghal a ni.