Ramchhung lawrkhawm

Punjab Congress MLA-te an bang

Supreme Court-in Punjab chu a ṭhenawm Haryana hnenah Sutley Yaman lui tui sem tura a tih avanga lungawi loin, nimin khan eptu pawl, Congress MLA-te an bang.

Judge panga awmna, costitution bench chuan Punjab chuan state dang nena inremna an lo siam tawh a thlauhthla thei ngawt lo tih a sawi a, state sorkarin hemi chungchanga resolution a siam chu dan kalh a ni, a ti. Punjab Deputy Chief Minister Sukbhir Singh Badal chuan an state lui tui chu eng kawng mahin state dang an sem dawn lo tih a lo sawi tawh a, state ṭhenawm nena lui tui an inchuh chungchangah hian eptu party, Congress chuan Akali Dal kaihhruai sorkar chu an thlawp a ni.

Sorkarin Highway booth khar

Rs 500 leh Rs 1,000 note thihin sum lengvelah harsatna a thlen avangin zanin zanlai thleng National Highway-a fee lakna booth zawng zawng khar rih a ni dawn.

Road Transport and Highways Minister Nitin Gadkari chuan National Highway booth-a fee khawn chu titawp lailawk tura hrilh an nih thu a sawi. Sorkar chuan Highway booth-ah hian zantin, zanlai thleng Rs 500 leh Rs 1,000 note te pawm an ni dawn tih a lo sawi tawh a, mahse pawisa thleng nawi duh vanga fee peknaa inhnawhkhawm tam lutukin traffic jam-te a siam avangin tihtawp a ni ta rih a ni. Highway booth-a fee lak loh vanga sorkarin sum a hloh chu sorkar lam chuan a tawrh mai a ngai dawn niin minister chuan a sawi.

Rs 1,000 note thar tichhuak leh dawn

Economic Affairs Secretary Shaktikanta Das chuan thla reilo hnuah Rs 1,000 note thar chu Reserve Bank of India chuan a tichhuak leh dawn tih a sawi. Sorkar laipui chuan Thawhlehni zan zanlai aṭanga Rs 500 leh Rs 1000 a tih thih hnuah, nimin khan Rs 500 leh Rs 2,000 note thar a tichhuak tawh. Das chuan Rs 2,000 note siam a nih chhan chu mipuite tana remchang zawk leh thil man sang zel vang niin nimina Economics Editors' Conference-ah a sawi a ni.

Das chuan, "RBI hian Rs 2,000 note tihchhuah chungchang hi ngun takin a zirchiang ang a, thla reilote hnuah security feature ṭha zawk nen Rs 1,000 note pawh tihchhuah thar leh a ni ang. A design leh rawng pawh tihdanglam a ni ang" a ti.