Sum tlem tham dahten harsatna an tawk lo ang : Arun Jaitley

Union Finance Minister Arun Jaitley-a chuan pawisa note tih thih a nih hnua bank hrang hranga sum deposit-naah, sum tlem tham deposit-te chuan harsatna leh buaina an tawk dawn lo tih a sawi.

Mi tam takin sumfaia an kawlte bank-ah deposit tumin an buaipui mek a, hetihlai hian sum tam tham dahte erawh chu thu zawhfiah an ni dawn a, a tlem tham dahte erawh chuan eng harsatna mah an tawk dawn lo tih Jaitley chuan a sawi a ni.

Sorkar laipui chuan ṭum khata cheng nuai 2.5 chin deposit-te chu an chhiah pek dante zirchiangin, an sum lakluh nena inphu loa hriat an nih chuan 200 % penalty thleng pek theih an ni dawn tih sorkar chuan a lo sawi tawh bawk. Bank hrang hrangte chu December thla thlengin sum dah lut hnemte chanchin kimchang chu chhinchhiah vek tura hriattir an ni.

Pawisa tih thih a nih hnua rangkachak leh tlereuh manto dang leite chu chhui zui an ni dawn bawk a, tlereuh zuarte chu an dawr aṭanga thil leite chhinchhiah vek tura tih an ni a, hei hi an zawm loh chuan a dawr neitu zawk chu hrem theih a ni ang.

Jaitley-a chuan pawisa note tih thih chuan hun eng emaw chen mipuite tan harsatna a thlen maithei a, mahse he thil hian eirukna, sum chheprelh leh firfiakte sum a tihbo dawn avangin mipuite chuan an la hlawkpui zawk dawn a ni, a ti.