Summit hmang turin Japan-ah PM a zin

Prime Minister Narendra Modi chu Annual Summit hmang turin nimin khan Japan ramah a zin.

Japan pana a chhuah hmaa chanchin thar lakhawmtute a kawmnaah, PM Modi chuan high speed railway-a ram pahnihte thawhdunna chuan investment leh insumdawn tawnna kawngah thlengin nghawng ṭha tak a nei dawn tih a sawi. He thil hian India ramah hna thawh tur tam zawk siamin, infrastructure a changtlun phah dawn a, 'Make in India' mission tihchakna tur ṭangkai tak a ni, a ti.

PM hi Japan-ah hian ni thum a cham dawn a, a cham chhung hian ram pahnihten civil nuclear lama an thawhdunna tur inremna thuthlung an ziah fel beisei a ni. Nikum December thlaa Japan Prime Minister Shinzo Abe-a'n India a rawn tlawh ṭum khan thawhdunna siam hi an lo remti tawh a, mahse technical leh legal lama buaina a la awm avangin ziahfel a la ni lo.

Modi hian Japan Emperor Akihito pawh a hmu dawn bawk a ni. Tun ṭum hi PM a nih hnua Japan a tlawh ṭum hnihna a ni.