PM Modi-a'n CM te meeting neihpui CM tam zawkin lockdown pawhsei duh lo

Prime minister Narendra Modi chuan nimin khan video conference hmangin chief minister-te meeting a neihpui leh a, ram puma lockdown kalpui mek chungchang leh, kal zel dan turte an sawiho. 

Nimina meeting hi Covid-19 a len hnua PM-in chief minister-te meeting a neihpui ṭum lina a ni a, union home minister Amit Shah pawh a tel ve a ni. Meeting-naa tel chief minister tam zawk chuan May 3 hnuah lockdown pawhsei an thlawp tawh lo a, mahse Meghalaya CM chuan lockdown pawhsei a duh thu a sawi a, Gujarat leh Himachal Pradesh pawhin khuahkhirhna la hman zel chu ṭha an tih thu an sawi rualin, thutlukna erawh PM kutah an dah thung. 

Modi chuan lockdown thawh hnihna kalpui mek, May 3-a a tawp hunah pawh­sei a nih dawn leh dawn loh chu ngaihtuah a la ni dawn tih a sawi. Hemi rual hian hri hluarna, hotspot-ah erawh chuan lockdown hi khauh taka kalpui turin a chah nghal bawk. 

Ram economy chung­changte sawiin, PM chuan chief minister-te hnenah hian hlauhthawn tur a awm loh thu a hrilh. CM-te chu an state-a hri kaite thinhrik leh enhran an nih lohna tura hma la turin a ti a, lockdown zawh hnua hma lak dan tur ruahmanna fel tak siam turin a chah bawk a ni.   

PM chuan state tina dis­trict-te chu hri kai an awm dan a zirin red zone (hri kai tamna), orange zone (hri kai tlemna) leh green zone (hri kai awm lohna) a thliar hran an ngai tih sawiin, green zone-ah chuan economic activity te chhunzawm theih a ni dawn a, social distancing erawh vawn zel a ngai a ni, a ti. Red leh orange zone-te chu green zone-a siam chhoh an nih theihna tura ṭan lak chhunzawm zel a ngai a ni, a ti. 

PM chuan Covid-19 do beihpui thlak chhunzawm zel chungin, ram economy pawh ngaih pawimawh a ngai tih a sawi. Social distancing chu a la pawimawh hle tih sawiin, mask pawh hman chhunzawm zel a ṭul tih a sawi. 

Meeting-a an sawiho aṭang hian lockdown zawh hnuah pawh zirna in  bakah sakhaw hmunte chu khar chhunzawm rih an la ni dawn niin a lang a, public transport lam pawh khuahkhirh chhun­zawm a nih rin a ni.