King George Medical University-in Plasma therapy treatment ti thei

Uttar Pradesh khawpui Lucknow-a awm King George Medical University chu ram chhunga Covid-19 kaite enkawlna tura plasma therapy treatment ti thei hmasa ber an ni. 

All India Radio-in a tarlan dan chuan Pathianni khan hripui kai mek kum 58 mi enkawlna atan an hmang tawh tih an tarlang.

King George Medical University vice chancellor Prof MLB Bhatt chuan plasma therapy treatment an ti thei chu an university tan chuan inchhuanna a nih thu sawiin, Indian Council of Medical Research-in a pawmpui aṭang khan he treatment ti thei tur hian an inbuatsaih nasa nghal hle tih a sawi.

Medicine department Assistant Professor Dr. D Himashu pawhin Pathianni khan Covid-19 kai, kum 58 mi, ventilator hmanga enkawl tawh plasma therapy treatment dose khatna an pek tawh thu sawiin, hma a sawn phah deuh niin an hria a; nimin lam khan dose hnihna pek lehnghal theih a nih thu a sawi a ni. He an enchhinna hi a hlawhtling a, damlo hian a dam phah a nih chuan hmasawnna nasa tak a ni dawn niin an ngai.